08 October 2010

Pajina web foun kona-ba Kodigu Sivil

La’o Hamutuk foin lansa pajina web foun ne’ebe inklui kopia ba esbosu Kodigu Sivíl, submisaun no rekursus seluk iha lingua Ingles no Tetum.
   Semana kotuk Komisaun A Parlamentu Nasional simu submisaun kona-ba esbosu Kodigu Sivil. Kodigu Sivil mak baze ba lei sivíl iha Timor-Leste, no iha impaktu ba ema Timor-oan husi moris to’o mate. Esbosu Kodigu Sivil hatete regras kona-ba kazamentu, adopsaun, paternidade, alimonia, divorsiú no warisan/eransa. Esbosu mos kria regras kona-ba direitu ba ema ne’ebe arenda rai no direitu uma-nain, akordus aluga rai, oinsa okupasaun legal, konpensasaun, hipoteka no direitu ba bee. Esbosu Kodigu Sivil iha pajina liu 500, no iha “kopia pas” husi Kodigu Sivil Portugal-nian, Kodigu Sivil ne’e la konsidera pratika lokal no kustume iha Timor-Leste.
   Esbosu Kodigu Sivil mak lei primeiru husi pakote esbosu lei kona-ba propriedade ne’ebe Komisaun A atu konsidera. (Planu uluk atu haree ba esbosu Lei ba Rai, maibe Komisaun deside hafoin Kodigu Sivil). La’o Hamutuk nia submisaun hato’o preokupasaun balun katak esbosu Kodigu Sivil sai ameasa ba ema ne’ebe vulneravel nia direitu ba rai, direitu ba uma no direitu ba bee. La’o Hamutuk ezizi ba Parlamentu atu hein to’o governu Konsultasaun Nasional kona-ba Rai molok aprova lei ne’ebe liga ba direitu ba propriedade.
   Ami prontu atu simu dokumentu no analiza tan husi parte hotu.

2 comments: